ءبىز ءوزىمىزدى تاۋ حالقىنىڭ ءور مىنەزدى ۇرپاعى – ۆايناحتار دەپ تانيمىز. داستۇرىمىزگە ادال, بەيبىتشىلىكسۇيگىش جۇرتپىز. 1944 جىلدىڭ قارعىس اتقىر 23 اقپانى كۇنى كوپتەگەن چەشەن مەن ينگۋش وتباسىلارىنىڭ شاڭىراعىن ورتاسىنا تۇسىرگەن وقيعا ورىن الدى. ول كاۆكازدان ءبىزدىڭ اتالارىمىزدى جاپپاي دەپورتاتسيالاپ, سۇرگىنگە ۇشىراتقان كۇن ەدى. بۇل قاندى تاريح تۋرالى كوپ جازىلدى, اقيقاتى ايتىلدى. وعان توقتالىپ جاتۋدىڭ قاجەتى قازىر از شىعار. بىراق سول تۇستا قازاق دالاسىنا كەلىپ تابان تىرەگەن ءبىزدىڭ اتالارىمىزدىڭ اماناتىنا اينالعان اڭگىمەلەردى جاڭعىرتىپ قايتالاۋدان ەشقاشان جالىققان ەمەسپىز. اتالارىمىزدىڭ اڭگىمەسى – كەڭپەيىل قازاق حالقىنىڭ قيىن-قىستاۋ شاقتاعى جاساعان جاقسىلىعى جايلى ەدى.
جالپى, ۆايناحتار عانا ەمەس, سول تۇستا قازاقستانعا كۇشتەپ قونىس اۋدارىلعان ۇلىستاردىڭ بارلىعى قازاق حالقىنىڭ الدىندا قارىزدار دەپ بىلەمىن. اشتىق, جاپپاي اتۋ مەن قۋدالاۋ, ودان كەيىنگى سوعىستىڭ اۋىرتپالىعىن قايىسپاي كوتەرگەن قازاقتاردىڭ ورتاسىنا كەلگەن ءبىزدىڭ اتالارىمىزدى جاتسىنباي, جارتى بولكە نانىن ءبولىپ جەگەن, قورجىن تامىنىڭ ءبىر بولمەسىن بوساتىپ بەرىپ پانالاتقان مەيرىمدى ۇلتتىڭ الدىڭدا باسىمىزدى ءيىپ, قۇرمەتپەن تاعزىم جاساۋ ادامدىق بورىشىمىز.
قازىر ءبىز تاۋەلسىز قازاقستاننىڭ ماۋەللى بايتەرەگىنىڭ ساياسىندا ءوسىپ-ونگەن, ءبىر مىقتى بۇتاققا اينالعان ءبىرتۇتاس ەلمىز. ەڭبەگىمىز ەلىمىزدى گۇلدەندەرۋگە باعىتتالىپ, ۇرپاعىمىزدى كوبەيتىپ, تاتۋ تىرشىلىك كەشۋدەمىز. ءتاۋبا!
مەملەكەت باسشىسى نۇرسۇلتان نازارباەۆتىڭ وسىدان ءبىراز بۇرىنعى اسسامبلەيانىڭ وتىرىسىندا ءسوز سويلەپ, 1 ناۋرىزدى قازاق حالقىنا العىس ايتۋ كۇنى ەتىپ بەلگىلەگەن كەزدەگى جينالىسقا قاتىسىپ وتىرعان ەدىم. ەلباسىنىڭ اۋزىمەن ايتىلعان وسى سوزدەن كەيىن مارقۇم اتامنىڭ بالا كەزدەن ايتىپ, ۇيرەتىپ كەتكەن اماناتى قايتا جاڭعىرعانداي بولدى. «راحمەت, قازاق باۋىرلارىم! سەندەرگە مىڭ العىس!» دەيمىن قازىر شاتتانىپ تۇرىپ.
قازاقتا «ەر تۋعان جەرىنە» دەگەن ءسوز بار. ءوزىم الماتى وبلىسىنىڭ تۋماسى رەتىندە ءبىلىمىم مەن عۇمىرىمدى ءوڭىردىڭ جۋرناليستيكاسىن دامىتۋعا جۇمساپ كەلەمىن. وبلىستىق «وگني الاتاۋ» گازەتىنىڭ باس رەداكتورى رەتىندە ەلىمىزدىڭ دامۋىنا ۇلەس قوسىپ, جاقسىلىقتىڭ جارشىسى بولۋدان ايانعان ەمەسپىن. اتاق-ابىرويسىز, سىي-سياپاتسىز دا ەمەسپىز, شۇكىر. وسىنىڭ بارلىعى ءبىر كەزدەرى ءۇزىم نانىن ءبولىپ بەرگەن قازاق باۋىرلارىمنىڭ ىقىلاسى دەپ بىلەمىن.
ەل امان بولسىن, ەلباسى باستاعان قازاقستاننىڭ نۇرلى كوشى بولاشاق تورىنە وزسىن!
اتساليم يديگوۆ,
الماتى وبلىستىق «وگني الاتاۋ» گازەتىنىڭ باس رەداكتورى
